من داها بورالاردان گئتمه لی

بیر سؤنمز ایشیق دویدوم اوزاقلاردان

او ایشیقا ساری من یورومه لی

نه شیرین رؤیالار باشیمدا بئجردیمسه،

نه دویغولو حیات گؤزومون اؤنونده یئر وئردیمسه

هامی سینی اونودمالی بوراخمالی

یالنیز آرخایین اول کی،

نه قدر اوزاقلاشسام، نه قدر اوجالسام، اینسه م

او قدر سنی آرتیق سئوه جه یم سئوگیلیم!

                                                   سون باهار/۱۳۸۲

                                                        تبریز

 

بیر قاواق آغاجی یام من

تارلانین قوینوندا بیتمیش.

اوپ اوزون گؤوده م،

یاپراقلارینی گؤیه تیکمیش.

و اوموزلاریمدا تانری لار

قاناد قانادا قاچیرلار!

و سن...

سحر چاغلاری سرین سرین اسن،

گونش له برابر گولومسه ین،

و تارلا اورتاسی آلوو تک پیریلدایان

نازلی ایشوه لی بوغداجیغیم سان.

ساغیم سولوم ایچیم دیشیم

                                        یانیر.

ساری ساچلاریندان کؤنلوم

                                    یاشام دادینی آلیر.

آما حییف...

ایچیم ایچیم ایچه جکدیم سنی

آغیز آغیز داداجاقدیم سنی

و ائشیم ائشیم سئوه جکدیم سنی

کئشکه بیچیلمه سیدین اگر!

تبریز

یئدیگیم چؤرک لری هئچ زامان اونودمام. دوغروسو: اونودامام!

آغ پامبیق کیمی لرینی اونودسام دا،

کوفله نمیش لرینی هئچ اونودامام.

سوموک لریمله، اتیمله و قارنیملا دویورام

                                                  یئدیگیم چؤرک لری...

و قانیملا، دامارلاریملا دویدوغوم: ایچدیگیم سولاردیر.

                                           (یا دا کی ایچیرتدیگیم یولداشلار)

تاتلی لاریلا گولدوم، آغلادیم آجی لاریلا

مردلرینی اؤزله دیم، گؤزله دیم نامردلرینی

 اووووف...

اووووف کاریخدیم دوکتور!!   

ان اونودولمامالی لاریم سئوگی لریم دیر.

قافاملا و اوره گیمله دیدوغوم سئوگی لر

درین لریله یاشادیغیم و دایازلارینی بوش وئردیگیم

                                                                  سئوگی لر!

و "سئودیگیم اینسان لاری هئچ زامان اونودمام" دییه بیله رم...

باشقالارینی بیلمم دوکتور

آما منی اینسانجاسینا یاشادانلار،

یئدیگیم، ایچدیگیم و بئجرتدیگیم

چؤرکلر، سولار و سئوگی لردیر!                       

دهشت لی قارا بیر گئجه ده،

دومان بورودو داغین دؤرت بیر یانینی،

                              آغیر بیر دومان

ائله آغیر کی پینارلار کسیلدی،

                   قوشلار دوردو اوخوماقدان

یالنیز داغین اوجا قارلی زیروه سی

                      باج وئرمه دن دایاندی دومان قارشیندا

کیم نه بیلیر بلکه ده او محتشم یالمان

گونشین ساچیلماسینی گؤزله ییردی...

آنجاق صبح آچیلدی، گون قالدی بولود آلتدا،

یانیقلی زیروه دایانابیلمه دن کؤچوب گئتدی

بیر دومان قالدی بیر داغ

دومان بورودو بوس بوتون زیروه سیز داغی.

                                                         ایلقار- ۱۳۸۲ اردیبهشت

   بیلدیگینیز کیمی فرزانه ده اؤلدو. گئچمیش نسلیمیز سولموش یاپراقلار کیمی بیرر بیرر دوشورلر و اونلارین اؤلمه یی، بیزیم نسلیمیزین یاشلانماسینی و تازا یاپراقلارا دؤنمه سینی منیم یادیما سالیر. بیزلر زامان گلدیکجه، بو قوجا گؤوده نین یاپراقلارینا چئوریلیک( و نه اینجه، ترتمیز، بالاجا و اینانیلماز درجه یه قدر یوموشاق یاپراقلاریق بیز).

   داها سولموش یاپراقلارین الیندن بیر ایش گلمیر. اونلار یالنیز گؤوده دن قیریلماق و یئره ساری اوزمک و توپراقلا ساریلماق گونلرینی گؤزله ییرلر. بو گؤوده نین یاشاتماغی داها بیزیم اوموزلارینا تاپشیریلیر. بیلمیرم بیزیم اینجه اوموزلاریمیز نه زاماناجا بو آغیر یوکو داشیابیله جک؟ بیلمیرم بو موحتضز و کوفله نمیش گؤوده یی، بو دهشت لی و قارانلیق اورمانلیقدا، نه واقتا قدر آیاق اوسته ساخلایا بیله جه ییک؟ قورخورام او آلاقارانلیق قیش آخشامیندان کی بیر کولک لی سازاغین الی ایله داها بیزیم بو اسکی گؤوده میزین ایشی بیتیرسین؟

   دون گئجه تیلویزیا دا بیر کوله ارکه گی الینده بالتا ایله گؤردوم. موحتضر گؤوده میزین کؤکونو هیرس ایله یامانجا ائشیردی. من قورخاراق و تیتره یه رک، بارماقلاریمین آراسیندان تیلویزیا یا باخیردیم. سونوندا گؤوده بوتون یاپراغلاریلا یئره ده یدی. هـــــــــه اینانمیرسینیز؟ گؤوده نین سیزیلتی لارینی اؤزوم ائشیتدیم؟